Estat ai en greu cossirier
Per un cavallier qu'ai agut,
E vuoil sia totz temps saubut
Cum ieu l'ai amat a sobrier;
Ara vei qu'ieu sui trahida
Car ieu non li donei m'amor,
Don ai estat en gran error,
En lieig e quand sui vestida.
Ben volria mon cavallier
Tener un ser en mos bratz nut,
Qu'el s'en tengra per ereubut
Sol qu'a lui fezes cosseillier;
Car plus m'en sui abellida
No fetz Floris de Blanchaflor:
Ieu l'autrei mon cor e m'amor,
Mon sen, mos huoillis e ma vida.
Bels amics avinens e bos,
Cora·us tenrai en mon poder?
E que jagues ab vos un ser
E qu'ie·us des un bais amoros;
Sapchatz, gran talen n'auria
Qu'ie·us tengues en luoc del marit,
Ab so que m'aguessetz plevit
De far tot so qu'ieu volria. |
|
