Arnaut de Cumenges
Gasconha
#1
Be∑m plai us usatges, que cor 

Be∑m plai us usatges, que cor
E qe∑is vai er mest nos meten
E∑m plai que dure longamen
Que cel que forssara∑l menor,
C'autre sia que lui fors ar
E volria pogues pojar
D'aissi tro a l'emperador,
Que ad un mal un autre pejor aia,
Mas non vezem c'autra dreitura plaia.

Enanz si son faich comprador
O toledor, qui non lor ven,
E aqui eis fan bastimen
Per vilas tolre a lor seignor,
Et aissi cujon restaurar
Lo dan q'ant pres per autr' afar,
Mas non restauron ges honor,
Ni lor non chal, sol lo pros lor n'eschaia,
De l'autr' afar: qui∑s voilla lo retraia.

E fan o cum li jogador
Que al grand joc primieiramen
Perden e puois ab pauc d'argen
Que roman van jogar aillor,
A petit joc, per essaiar
S'o poiria d'autrui cobrar;
Et aissill ric home major
Ant trop perdut, per que chascuns s'essaia
En tal percatz don calque gazaing traia.

Ab mas coblas vai, Bec d'Austor,
Vas calque part que a ti mezeis plaia,
Qu'eu non sai luoc on bon enviar t'aia.